Семейлік тұрғын меткатинон психотроптық препаратының аналогын сатқан.
Абай облысында полиция қызметкерлері ірі есірткі арнасын жойып, 20 жастағы Семей қаласының тұрғынын ұстады. Жас жігіт синтетикалық есірткі заттарын сақтау және тарату күдігіне ілінді. Күдіктінің пәтеріне жедел тінту жүргізу барысында жедел уәкілдер 25 зип-пакетке салынған ақ түсті ұнтақ тәріздес затты, есірткі заттарын өлшеуге арналған электронды таразыларды және тыйым салынған заттарды орауға пайдаланылған скотчты тәркіледі.
Сараптама нәтижесінде алынған заттың меткатинон (эфедрон) психотроптық препаратының аналогы екені анықталды, оның жалпы салмағы 25,84 граммды құрады.
"Қара нарықта мұндай партияның құны 1,3 миллион теңгеге дейін жетуі мүмкін. Күдіктіге қатысты сотқа дейінгі тергеу амалдары басталды. Қолданыстағы заңнамаға сәйкес, оған 10 жылға дейін бас бостандығынан айыру жазасы тағайындалуы мүмкін. Қазіргі уақытта ол уақытша ұстау изоляторына қамалды" — делінген баспасөз хабарламасында.
Полиция қызметкерлері есірткі қылмысымен күресті жалғастырып, өңір тұрғындарын заңсыз есірткі айналымының зиянды әсерінен қорғауды жалғастыруда.
Сурет: Абай облысы ПД баспасөз қызметі
