Премьер-министрдің орынбасары – ұлттық экономика министрі Нұрлан Байбазаров мобильді аударымдарды бақылау мәселесі қайта қаралатынын айтты, — деп хабарлайды Caravan.kz медиа порталы Tengrinews.kz-ке сілтеме жасап.

Үкіметте өткен брифинг барысында Байбазаров бұл мәселе күрделі екенін айтты.

"Сондықтан мен бұл мәселені қайта қарауды тапсырамын, оны қаржы-экономикалық блок аясында қайта қараймыз. Тағы да механизмді, критерийлерді егжей-тегжейлі талқылаймыз. Бұл мәселеге қайта ораламыз", — деді шенеунік.

Еске салайық, 2022 жылғы наурыздан бастап "Төлемдер және аударымдар туралы" заң "мобильді төлем" ұғымымен толықтырылды, ол QR-кодты қолдана отырып, екінші деңгейдегі банктердің мобильді қосымшасы немесе POS-терминалдар арқылы қабылданатын қолма-қол ақшасыз төлем деп түсіндіріледі. Өзгерістер жеке мақсаттарда қолданылатын жеке тұлғалардың аударымдарына қатысты емес. Яғни, жеке тұлғалар, бұрынғыдай, өздерінің жеке мақсаттары үшін мобильді аударым жасай алады және қабылдай алады: туыстарына, достарына аударымдар, ата-аналар мен балаларға көмек, сондай-ақ басқа да өмірлік жағдайлар.